1st COAS International High Altitude Tri-Adventure Competition-2079 सम्पन्न

१. नेपाली सेनाको आयोजनामा विभागीय टिम लगायत विभिन्न क्लबका स्वदेशी तथा बिदेशी खेलाडीहरुलाई सहभागी गराई मुस्ताङ्ग जिल्ला, जोमसोम ईलाकामा संचालन भएको अन्तराष्ट्रिय स्तरको "1st COAS International High Altitude Tri-Adventure Competition-2079" प्रतियोगिता आज मिति २०७९ जेठ ०७ गते प्रधान सेनापति महारथी श्री प्रभुराम शर्माको प्रमुख आतिथ्यतामा सम्पन्न भएको छ ।

२. उक्त प्रतियोगितामा १०० मिटर क्लाईम्विङ्ग, ४.७५ कि.मि. दौड र १५.३५ कि.मि. साईक्लिङ्ग गरी ३ (तीन) वटा ईभेण्टहरु समावेश गरि जम्मा दुरी २०.२ कि.मि. रहेको थियो । कुल २२ टिमहरुको सहभागिता रहेको उक्त प्रतियोगितामा नेपाली सेना, त्रिभुवन आर्मी क्लबको ६ टिम (पुरुष ४ टिम र महिला २ टिम) सहित स्वदेशी १८ टिम (पुरुष १३ टिम, महिला ५ टिम)‌ र अन्तराष्ट्रिय ४ टिम (भारतीय सेना- १ टिम, बंगलादेशी सेना-१ टिम र ब्रिटिस गोर्खा- २ टिम) मा आबद्ध ४४ जना खेलाडीहरुको सहभागीता रहेको थियो ।

३. नेपाली सेनाका रथीवृन्द तथा अधिकृत, अन्य सुरक्षा निकायका प्रमुख, स्थानीय जनप्रतिनिधि, सञ्‍चारकर्मी तथा स्वदेशी एवं विदेशी खेल प्रेमी दर्शकहरुको उल्लेख्य उपस्थिती रहेको उक्त प्रतियोगिताको नतिजा परिशिष्ट "क" यसैसाथ संलग्न गरिएको छ । 

४. साथै, उक्त प्रतियोगितामा उत्कृष्ट नतिजा हासिल गर्न सफल खेलाडीहरुलाई प्रधान सेनापति महारथी शर्माले पदक, ट्रफि, प्रमाण-पत्र सहित नगद पुरस्कार प्रदान गर्नुका साथै उक्त प्रतियोगितालाई सफलतापूर्वक सम्पन्न गर्न योगदान पुर्‍याउने पोखरास्थित श्री मध्य कमाण्ड हेडक्वार्टर, जोमसोमस्थित श्री नं. २३ बाहिनी अड्डा, श्री उच्च शिखर शिक्षालय र श्री नारायणदल गण तथा गैह्र सैनिक संस्थातर्फ श्री नेपाल इन्भेष्टमेन्ट बैंक लिमिटेड र श्री सिटिजन्स बैंक लिमिटेडलाई कदर-पत्र समेत प्रदान गर्नु भएको थियो ।