नेपाली सेनामा “लैङ्गिक आचरण सम्बन्धी निर्देशिका २०७०” र “महिला सैनिक निर्देशिका २०७०” लागु गरिएको

१. नेपाली सेनामा उच्च स्तरको अनुशासन तथा आचरण कायम राख्न तथा सुरक्षित, मर्यादित र समान वातावरण सृजना गर्ने उद्देश्यले “लैङ्गिक आचरण सम्बन्धी निर्देशिका २०७०” र “महिला सैनिक निर्देशिका २०७०” लागु गरिएको छ । 
२. यस लैङ्गिक आचरण सम्बन्धी निर्देशिकाले आ–आप्mनो कार्यस्थलमा महिला मैत्री वातावरण सृजना गरी महिला बिरुद्ध हुन सक्ने कुनै पनि कार्यलाई सुन्य सहनशिलता (Zero Tolerance) नीतिको प्रभावकारी कार्यान्वयन गर्न मद्धत पुग्ने छ । यस निर्देशिकामा विभिन्न लैङ्गिक हिंसाको परिभाषा, उजुरी तथा सँजाय सम्बन्धी व्यवस्थाहरु समावेश गरिएका छन् ।
३. यसै गरी महिला सैनिक निर्देशिकाले नेपाली सेनामा सेवारत महिलाहरुलाई तोकिएको समुहमा नियुक्ति भई काम गर्न, उक्त समुहको सेवा सुविधा प्राप्त गर्न, सो समुहको माथिल्लो तहसम्म क्षमता तथा योग्यताको आधारमा बे–रोकटोक बृति बिकासको सुनिश्चितता प्रदान गर्नेछ ।  
४. महिलाहरुलाई नेपाली सेनामा बि.सं. २०१८ सालमा नर्सिङ्ग सेवामा, वि.सं. २०२२ सालमा प्यारा फोल्डरमा र वि.सं. २०२६ सालमा महिला चिकित्सकमा भर्ना लिई क्रमिक रुपमा प्राविधिक सेवा र बि.सं.२०६१ सालबाट साधारणतर्फ समेत महिला भर्ना खुल्ला गरिएको थियो । विद्यमान संविधानले समाबेशी तर्फ सुरक्षित गरेको ४५ प्रतिशत कोटामा विभिन्न समुहको प्रतिनिधित्व हुने अवसर प्रदान गर्ने संवैधानिक प्रावधान रहेको छ । हाल नेपाली सेनाले नयाँ भर्ना गर्दा समाबेशी तर्फ छुट्याईएको ४५ प्रतिशत कोटालाई सतप्रतिशत मानी सोको २० प्रतिशत कोटा महिलाहरुको लागि छुट्याई भर्ना गर्दै आएको छ । जस अनुसार हाल नेपाली सेनामा साधारण तथा प्राविधिक तर्फ अधिकृत, पदिक तथा अन्यदर्जा गरी जम्मा २२४६ जना महिलाहरु कार्यरत छन् । 
५. यस सन्दर्भमा महिला सैनिकहरुको लैङ्गिक अधिकार, सुरक्षा र बृत्ति विकासलाई संरक्षण गर्नुपर्ने दायित्व महसुस गरी नेपाली सेनाले संविधानले संरक्षण गरेका महिलाहरुको अधिकार सुनिश्चित गर्ने र अन्तर्राष्ट्रिय महासन्धिको भावना अनुसारको नीति अवलम्वन गर्दै यि दुई निर्देशिकाहरु लागु गरिएको हो । यसबाट संभावित लैङ्गिक विभेदको रोकथाम र आवश्यकता अनुसार उचित कारवाही गरी प्रभावकारी न्याय प्रदान गर्न सहयोग पुग्ने छ । यस किसिमको निर्देशिकाले लैङ्गिक विभेदता रोकथाम गर्न, सकारात्मक वातावरण सृजना गरी समग्र महिला सैनिकहरुको पेशागत क्षमतालाई माथि उठाउन र सुरक्षण प्रदान गर्न सहज हुने विश्वास नेपाली सेनाले लिएको छ ।